কলকাতাৰ সাউথ ল’ কলেজত ছাত্ৰীক গণধৰ্ষণ কৰাৰ হৃদয়বিদাৰক ঘটনাৰ পিছত ৰাজ্যজুৰি তীব্ৰ ক্ষোভৰ সৃষ্টি হৈছে। ছাত্ৰীগৰাকীৰ সৈতে এই জঘন্য কাণ্ডটো ২৫ জুনৰ সন্ধিয়া কলেজ চৌহদত সংঘটিত হয়। ঘটনাৰ গুৰুত্ব বুজি ভাৰতীয় জনতা পাৰ্টি (বিজেপি)-য়ে ইয়াৰ ওপৰত কঠোৰ প্ৰতিক্ৰিয়া ব্যক্ত কৰি চাৰিজনীয়া অনুসন্ধান সমিতি গঠন কৰিছে। দলটোৰ ৰাষ্ট্ৰীয় সভাপতি জে পি নাড্ডাই এই ঘটনাৰ তীব্ৰ নিন্দা কৰি ইয়াক পশ্চিমবংগৰ আইন-শৃংখলাৰ অৱনতিৰ ফল বুলি অভিহিত কৰিছে।
জে পি নাড্ডাই কয় যে ৰাজ্যখনত মহিলাৰ সুৰক্ষাৰ ক্ষেত্ৰত পৰিস্থিতি অতি উদ্বেগজনক হৈ পৰিছে আৰু এনে ঘটনাত কোনো ধৰণৰ গাফিলতি সহ্য কৰা নহ’ব। তেওঁ দোষীক কঠোৰৰ পৰা কঠোৰতম শাস্তি প্ৰদান কৰাৰো কথা কয়।
বিজেপিৰ দলটোৱে ঘটনাস্থল পৰিদৰ্শন কৰিব
ঘটনাৰ তদন্তৰ বাবে গঠন কৰা সমিতিত প্ৰাক্তন কেন্দ্ৰীয় মন্ত্ৰী সত্যপাল সিং, প্ৰাক্তন কেন্দ্ৰীয় মন্ত্ৰী মীনাাক্ষী লেখি, ৰাজ্যসভাৰ সাংসদ বিপ্লৱ দেৱ আৰু জ্যেষ্ঠ অধিবক্তা তথা সাংসদ মনন কুমাৰ মিশ্ৰক অন্তৰ্ভুক্ত কৰা হৈছে। এই দলটোৱে অতি সোনকালে কলকাতাত উপস্থিত হৈ ঘটনাস্থলী পৰিদৰ্শন কৰিব, ভুক্তভোগী আৰু তেওঁৰ পৰিয়ালৰ সৈতে সাক্ষাৎ কৰিব আৰু প্ৰশাসনিক বিষয়াসকলৰ সৈতেও কথা পাতি তেওঁলোকৰ প্ৰতিবেদন প্ৰস্তুত কৰিব। এই প্ৰতিবেদন দলীয় সভাপতি জে পি নাড্ডাক দাখিল কৰা হ’ব।
বিজেপিৰ দ্বাৰা জাৰি কৰা পত্ৰত কোৱা হৈছে যে এই সমিতিখন বিষয়টোৰ সৈতে জড়িত সকলো তথ্যৰ এক নিৰপেক্ষ তদন্ত কৰিব, যাতে ভুক্তভোগীয়ে ন্যায় পায় আৰু ভৱিষ্যতে এনে ঘটনাৰ পুনৰাবৃত্তি ৰোধ কৰিব পৰা যায়।
ইতিমধ্যে চাৰি অভিযুক্তক গ্ৰেপ্তাৰ কৰা হৈছে
এই পৰ্যন্ত আৰক্ষীয়ে এই গোচৰত চাৰিজন লোকক গ্ৰেপ্তাৰ কৰিছে। ইয়াৰে দুজন অভিযুক্ত কলেজৰ বৰ্তমানৰ ছাত্ৰ, এজন প্ৰাক্তন ছাত্ৰ আৰু চতুৰ্থজন অভিযুক্ত হৈছে কলেজত নিযুক্ত সুৰক্ষাকৰ্মী। শনিবাৰে আৰক্ষীয়ে গাৰ্ডজনক গ্ৰেপ্তাৰ কৰে, কিয়নো জেৰাৰ সময়ত তেওঁৰ ভাষ্য অসঙ্গতিপূৰ্ণ আছিল আৰু চিচিটিভি ফুটেজত তেওঁৰ সন্দেহজনক গতিবিধি দেখা গৈছিল।
আৰক্ষীৰ মতে, ঘটনাৰ সময়ত গাৰ্ডজন কৰ্তব্যত উপস্থিত আছিল যদিও তেওঁ দায়িত্ব পালনত গাফিলতি কৰিছিল। বৰ্তমান আৰক্ষীয়েও তদন্ত কৰি আছে যে তেওঁ অকলে কৰ্তব্যত আছিল নে আন কাৰোবাৰ সৈতে মিলি এই ঘটনা সংঘটিত কৰিছিল।
মহিলাৰ সুৰক্ষাৰ প্ৰশ্ন
এই ঘটনা এনে এক সময়ত পোহৰলৈ আহিছে যেতিয়া শেহতীয়াকৈ কলকাতাৰ আৰ জি কৰ মেডিকেল কলেজতো ছাত্ৰীৰ সৈতে জড়িত এক গুৰুতৰ ঘটনাই ৰাজ্যখনক জোকাৰি গৈছিল। এতিয়া ল’ কলেজৰ এই ঘটনাই পুনৰ ৰাজ্যখনত মহিলাৰ সুৰক্ষা ব্যৱস্থাৰ ওপৰত প্ৰশ্ন উত্থাপন কৰিছে। স্থানীয় লোক আৰু সামাজিক সংস্থাসমূহে এই ক্ষেত্ৰত তাৎক্ষণিক পদক্ষেপ গ্ৰহণ কৰাৰ লগতে কঠোৰ শাস্তিৰ দাবী জনাইছে।
